Londen. - Suid-Afrika se platteland is besig om te ontaard in 'n slagveld waar amper 2 000 mense reeds vermoor is net omdat hulle wit boere is, het die The Sunday Times Magazine die afgelope naweek in 'n voorbladartikel berig.

Op die voorblad van die glanstydskrif wat elke Sondag saam met die Londense The Sunday Times versprei word, is 'n foto van die Hart-familie van Krugersdorp voor hul grasdakhuis saam met hul private veiligheidswag.

Die artikel begin met 'n reuse-foto van honderde kruise wat langs die pad naby Mokopane (Potgietersrus) geplant is met die woord "plaasmoorde" in die agtergrond. Die byskrif lui: "It is not the Somme, it is South Africa - and a memorial to nearly 2 000 white farmers murdered in the last ten years."

"Die motief is nie diefstal nie, ook nie grond nie, soos in Zimbabwe - maar weerwraak, aangevuur deur rassisme en afguns. En soos die moorde aangaan, doen die polisie niks nie." Die skrywer, Brian Moynahan, sê die buitewêreld is welbekend met Zimbabwe se situasie waar boere van hul plase verjaag en hul grond sonder vergoeding afgevat word.

Daarteenoor het Suid-Afrika 'n goeie grondhervormingsprogram waarmee die meeste mense, insluitend die wit boere, saamstem. Maar terwyl bitter min boere in Zimbabwe vermoor word, word honderde boere elke jaar in Suid-Afrika vermoor sonder dat die buitewêreld daarvan kennis neem. Volgens die artikel is daar mense wat glo dat jou kanse tien keer groter is om vermoor te word as jy op 'n plaas woon as op enige ander
plek in Suid-Afrika."Dit maak boerdery (in Suid-Afrika) die mees gevaarlike beroep in die
nie-militêre wêreld." Hy sê 'n besoek aan enige plaas in Suid- Afrika toon duidelik hoe
gevaarlik dit is.

Mnr. Werner en mev. Brigitte Wiedeck, wat naby Makhado (Louis Trichardt) in die noorde van Limpopo boer, vertel dat hulle al agt keer in drie jaar beroof is. Twee keer is hul aangerand, die ergste was verlede April "Hulle het 'n geweer teen my man se kop gedruk en hom vasgebind en my gemuilband met 'n serp," het mev. Wiedeck aan die Sunday Times vertel. "Toe het hulle my met 'n ysterpaal begin slaan. Hulle het reeds al ons geld gehad, maar het op meer aangedring. Ek het aan my eie bloed begin verstik. Ek het gemaak of ek dood is en hulle is weg." Sy het ernstige skeudelbreuke opgedoen en haar regteroog verloor. Die polisie het twee uur geneem om op te daag en het glad nie vir koeëlpunte, vingerafdrukke of spore gesoek nie. "Hulle het min of meer niks gedoen nie."

"Ek kan die misdaad aanvaar," sê mnr. Paul Hart van Krugersdorp, "maar ek kan nie die geweld wat daarmee saam gaan, hanteer nie." Luidens die artikel toon regeringsondersoeke dat die aanvalle geen definitiewe patroon het of politiek gemotiveer is nie. Hoewel die regering dus nie die aanvalle inspireer nie, kan talle kabinetsministers egter beskuldig word dat hulle nalatig is om die aanvalle te laat voortgaan, lui die artikel. Selfs pres. Thabo Mbeki sien nie die erns van die situasie in nie. Die koerant haal Mbeki aan wat sê wit mense het 'n "psigose van vrees oor hul oorlewing in 'n see van swart barbare" en dat hulle "verslaaf" is aan hul eie vrese. Dit is daarom dat boere in Suid-Afrika dit nie baie snaaks vind as adj.pres. Phumzile Mlambo-Ngcuka 'n grappie maak oor grondhervorming in Zimbabwe en die feit dat Suid-Afrika baie het om te leer by dié land nie.