| |
|
CURRICULUM VITAE
|
 |
| Mnr. JACO MULDER |
- Mnr. Jaco Mulder is gebore op 15 Januarie 1964 te Krugersdorp. Hy matrikuleer aan die Hoërskool Monument in 1981. Hy studeer in die regte (B Proc) by RAU vanaf 1982-1984 en slaag later ook sy graad 8 eksamen en onderwyserslisensiaat in klassieke kitaar aan UNISA. Hy gee dan ook klassieke kitaaronderrig by die destydse kultuursentrum te RAU. Hierna sluit hy by die Suid-Afrikaanse Polisie aan waar hy vir 4 jaar diens doen as dienspligtige by die destydse Suid-Afrikaanse Kriminele Buro en later by die Pretoria Sentraalspeurtak en -strafsake.
- Hy is getroud met Lynette Botha, ‘n fisioterapeut en hulle het twee seuns, Adriaan en Daniel.
- In 1989 betree hy die sakewêreld en behartig sedertdien uitgebreide sakebelange ondermeer as restauranteienaar, wynmaker en eiendomsontwikkelaar.
- Sy liefde vir diens aan die gemeenskap en sy volk het hy geërf van sy ouers wat beide onderwysers was en sy betrokkenheid by die Voortrekker-beweging as baasverkenner en hoofspanleier van sy kommando.
- Hy raak op RAU by die studente politiek betrokke en sluit eers by die Nuwe Konserwatiewe party van dr. Connie Mulder aan en later by die Konserwatiewe party van Suid-Afrika, onder leierskap van dr. Treurnicht.
- Hierna raak hy op tak- en kiesafdelingsvlak as vrywilliger betrokke en word in 1993 verkies as die Wesrand-streekleier van die Afrikaner Volksfront. In 1994 sluit hy by die Vryheidsfront aan en word later as streekleier van Krugersdorp verkies, in 1999 as Gauteng-sekretaris en op 27 Februarie 2003 as leier van die party in Gauteng.
- Sedert 2004 is hy lid van die Gautengse Wetgewer en dien op verskeie portefeulje komitees en staande komitees in die provinsie waaronder Landbou- en Landelike Ontwikkeling, Gemeenskapsveiligheid en Infrastruktuur.
- Hy dien ook op die Uitvoerende Dagbestuur, Federale Dagbestuur, Federale Raad en ‘n aantal komitees van die VF Plus.
- Buite partyverband dien hy ook sedert die stigting van NABUVSA (Nasionale Burgerlike Veiligheid- en Sekuriteitsaksie) as Nasionale Voorsitter van dié onafhanklike, nie-winsgewende en vrywillige organisasie wat namens die gemeenskap misdaad op nasionale vlak beveg en as lid van die Uitvoerende Raad van die Orania Beweging (Afrikaner Vryheidsbeweging).
- Jaco is ook die Strategiekomitee-voorsitter van die beheerliggaam van Hoërskool Noordheuwel op Krugersdorp.
|
|
